Токон Мамытов: “Баткенде кырдаал туруктуу, азык-түлүк жеткирүүгө көңүл буруу керек”

Бүгүн, 18-январда КСДП фракциясы жыйынында вице-премьер-министр Токон Мамытов Баткен облусундагы абал тууралуу маалымат берип, бир катар маселелерди жабык эшик артында талкуулоону суранды. Анын айтымында, азыркы тапта облустагы абал туруктуу, бирок айрым жерлерге азык-түлүктү жеткирүүгө көңүл буруу керек.

Депутаттар колдоого алышып, өкмөт мүчөлөрү менен Баткен облусундагы чек арадагы абалды жабык эшик артында талкуулашууда.

Эске салсак, 11-январда саат 13:00 чамасында Баткен облусунун Ак-Сай айыл аймагында кыргыз-тажик чек арачылары атышып кетишкен. КРнын Вице-премьер-министри Токон Мамытов журналисттер менен жолугушууда чек ара чатагынын хронологиясын айтып, "жаңжалда тажик тарап кыргыз чек арачыларына миномёттон ок чыгарышты" деген Чек ара кызматынын маалыматын аныктады. Окуя болгон жерден 6 оюлган жер жана бир жарылбай калган снаряд табылган.

Жаңжалдын натыйжасында кыргыз тарабынан 6 чек арачы, тажик тараптан 2 адам жаракат алган.Кыргызстандык 3 чек арачы Бишкекке дарылоого алынып келинген.

Баткенде кырдаал туруктуу жана Ак-Сай – Көк-Таш жол курулушу улантылууда. Бирок тажик тарап айланып өтчү жолдун курулушуна каршы экенин билдирип келүүдө.

Автор: Айпери Ганыжан кызы