Адахан Мадумаровдун сурак берип чыкканы айтылууда

"Бүтүн Кыргызстан" партиясынын лидери Адахан Мадумаров кечээ, 22-ноябрда сурак берип чыкканы айтылууда. Бирок ал кайсы мекемеде болгону азырынча белгисиз.

Буга чейин аталган партиянын Facebook баракчасында 22-ноябрь күнү болжол менен эртең мененки саат 07:00 чамасында укук коргоо органдары Мадумаровдун жашаган үйүндө тинтүү жүргүзүшкөнү, натыйжада, үйдөгү сейф, камера, ноутбук, компьютер, уюлдук телефондор жана башка жеке буюмдар алынганы тууралуу маалымат жарыяланган. Тинтүү процесси саат 12:00дө аяктап, саясатчыны укук коргоо кызматкерлери белгисиз тарапка алып кетишкени белгиленген.

Ошондой эле маалыматта, ошол күнү болжол менен саат 15:00дө укук коргоо органдары Мадумаровдун уулу Нурмухаммед Мадумаровду жана анын жубайын да белгисиз тарапка алып кетишкени кошумчаланган.

Азырынча Адахан Мадумаровдун уулу жана келини тууралуу кошумча маалыматтар айтыла элек. Бул боюнча укук коргоо органдары тарабынан расмий маалымат бериле элек.

Автор: Кылымбек Бейшеев
Фото: Интернеттен алынды