Жарандык активист Айбек Теңизбайды УКМК кармаганы айтылды

Жарандык активист Айбек Теңизбай учурда УКМКнын Бишкек шаардык башкармалыгында экенин МедиаХаб кабарлады.

Басылмага муну активисттин досу Азиз Таалайбек тастыктаган. Ал досунун үйүндө бүгүн, 11-декабрда эртең менен тинтүү жүргүзүлүп, телефон, планшет, ноутбугу алынганын айткан. Айбек Теңизбай эмне үчүн кармалганы белгисиз бойдон экени кошумчаланган.

Буга чейин активист Чүйдүн Кой-Таш айылында кармалганы айтылган. Азырынча УКМК бул боюнча маалымат бере элек.

Айбек Теңизбай YouTube`дагы каналында бир нече саясатчылар менен маек курган. Анда ал маектешине сөз эркиндиги тууралуу суроолорду да узатып келет. Теңизбай социалдык тармактагы баракчасында бийликтин айрым иштерин сындаган постторду жазып турат.

Автор: Кылымбек Бейшеев
Фото: Интернеттен алынды