Грузияда 2027-жылдан тарта пластик бөтөлкөдөгү суусундуктарды сатууга тыюу салынат

Грузия бийлиги 2027-жылдын февраль айынан тарта пластик бөтөлкөдөгү суусундуктарды сатууга тыюу салууну пландап жатат. Бул тууралуу өлкөнүн айлана-чөйрөнү коргоо боюнча вице-министри Соломон Павлиашвили билдиргендигин "Вестник Кавказа" басылмасы жазды. Ведомство бизнеске ашыкча басым жасалбашы үчүн чараларды баскычтуу түрдө киргизүүнү көздөп жатат.

Мындай чектөөнүн негизги тышкы өзгөчөлүктөрү:

10 литрден ашык сыйымдуулуктагы бөтөлкөдөгү суу жана экспортко багытталган продукция чектөөгө кирбейт.
Өсүмдүк майын пластик таңгакта сатуу улана берет.

Биринчи этапта суусундуктар кымбатташы мүмкүн, бирок узак мөөнөттө көп жолу колдонулуучу таңгактардын жардамы менен баалар төмөндөйт. Өзгөрүүлөр тамак жеткирүү тармагын да камтыйт: пластикти алмаштыруу баанын кымбаттоосуна алып келет, айрым тамактар менюдан алынышы мүмкүн.

Изилдөөлөргө караганда, Грузия жыл сайын болжол менен 612,5 миллион бир жолку пластикалык буюмдарды, анын ичинде стакандар, капкакчалар, контейнерлер, бычак-кашык, сымал түтүктөрдү колдонуп келет. Бул 3,9–5,9 миң тонна пластикти түзөт. Эл аралык изилдөөлөр көрсөткөндөй, азык-түлүк менен байланышкан бир жолку пластик адамдын ден соолугуна зыян келтирет жана айлана-чөйрөнү булгайт.

Мындан тышкары 1-январдан тарта Грузияда айрым бир жолку пластикалык буюмдарды, анын ичинде бычак, кашык, тарелкалар, түтүктөр, азык-түлүк контейнерлерин өндүрүүгө жана сатууга тыюу салынды. Ресторан жана кафе сыяктуу жайлар да даяр тамактарды мындай буюмдарда бербеши керек.

Автор: Айзада Кыдырмышева