Ак-Сууда аял 17 жаштагы кызынын кош бойлуу экенин билгенден кийин өзүн өрттөп жиберди

Ысык-Көлдүн Ак-Суу айылында 40 жаштагы аял өзүн-өзү өрттөп каза тапты. Бул тууралуу облустук милиция билдирди.

Маалыматка ылайык, маркумдун 17 жаштагы кызы кош бойлуу болуп калган. Милиция 25-февралда териштирүү үчүн өспүрүмдү суракка алган. Бирок анын апасы "элдин бетин кантип карайм?" деп, суракка катышуудан баш тарткан. Андыктан өспүрүм кыз Ак-Суу райондук Үй-бүлөнү жана балдарды коргоо башкармалыгынын кызматкеринин катышуусунда суралган.

25-февралда саат 21:00 чамасында кыздын апасы “дүкөндөн суусундук алам” деп чыгып кетип, күйүтүнө чыдабай, өзүнүн денесине бензин куюп, өзүн-өзү өрттөгөн. Натыйжада ал Ысык-Көл облустук ооруканасына жеткирилип, алган күйүк жаракаттарынан улам каза болгон.

Учурда соттук-медициналык экспертиза дайындалып, тергөөгө чейинки териштирүү иштери жүрүүдө.