Европадагы 10 өлкө согуш учурунда калкты эвакуациялоо боюнча келишимге кол койду

Швеция Дания, Эстония, Финляндия, Исландия, Латвия, Литва, Норвегия, Польша жана Германия Балтика жана Түндүк Европадагы калкты коргоо боюнча келишимге кол коюшту. Бул тууралуу чет элдик басылмалар Швеция өкмөтүнүн канцеляриясына таянып билдиришти.

Маалыматка ылайык, кризис же согуш учурунда эл чек аралар аркылуу убактылуу эвакуацияланат.

"Аталган өлкөлөр адамдарды чек аралары аркылуу эвакуациялоо планын биргелешип түзөт. Бул транспорттук жолдорду, чек арадагы текшерүүлөрдү, эвакуациялык коридорлорду уюштурууну, адамдарды кабыл алып каттоону жана өзгөчө коргоого муктаж топторду коргоону камтыйт",- деп айтылган билдирүүдө.

Ошондой эле, "Биз НАТО мүчөлөрү жана коңшу өлкөлөр катары бири-бирибизге көз карандыбыз. Бул келишим аймактардагы кызматташууну тереңдетүүгө болгон аракетибизди көрсөтөт",- деп билдирген жарандык коргонуу министри Карл-Оскар Болин.

Белгилей кетсек, тараптар меморандумга февраль айында Швециядагы жолугушууда кол коюшкан.

Автор: Меерим Кабылова