Казакстан Тынчтык кеңешине каржылык салымсыз кошулду

Казакстан Газадагы тынчтыкты камсыздоого багытталган Тынчтык кеңешине эч кандай каржылык салым кошпостон мүчө болду. Бул тууралуу өлкөнүн Тышкы иштер министрлигинин расмий өкүлү Ерлан Жетыбаев жергиликтүү ЖМКларга билдирди.

Анын айтымында, кеңешке кошулуу өлкөнүн улуттук кызыкчылыктарына жооп берип, тышкы саясаттагы эл аралык диалогду өнүктүрүү, коопсуздукту колдоо жана көп тараптуу кызматташууну бекемдөө багытына шайкеш келет.

Жетыбаевдин сөзүнө ылайык, президент Касым-Жомарт Токаев бул демилгени өз убагындагы жана практикалык жыйынтыкка багытталган кадам катары баалаган. Мамлекет башчысы тынчтык куруу декларациялар менен эмес, реалдуу аракеттер аркылуу ишке ашышы керектигин белгилеген.

ТИМ өкүлү каржылоо маселесине токтолуп, Казакстан кеңешке кирүүдө эч кандай каражат төлөбөгөнүн айтты. Уставда көрсөтүлгөн 1 миллиард доллар өлчөмүндөгү ыктыярдуу салым мүчөлүк үчүн милдеттүү талап эмес жана ар бир мамлекет аны өз каалоосу менен гана бере алат.

Ошондой эле Gaza Strip аймагына аскер жиберүү тууралуу маалыматтар боюнча комментарий берип, кеп негизинен гуманитардык жардам жөнүндө болуп жатканын белгиледи. Анын айтымында, Казакстан эл аралык стабилдештирүү күчтөрүн колдоого, талаа госпиталы бар медициналык бөлүктөрдү жана жарандык-аскердик координация борборунун байкоочуларын жөнөтүүгө даяр.

Мындан тышкары өлкө палестиналык студенттер үчүн казакстандык жогорку окуу жайларында беш жыл ичинде 500 билим берүү грантын бөлүүнү, ошондой эле электрондук өкмөттү өнүктүрүү боюнча өз тажрыйбасын бөлүшүүнү пландап жатат.

Эске салсак, февралда өткөн кеңештин инаугурациялык жыйынында АКШ президенти Дональд Трамп катышуучуларга ыраазычылык билдирип, Казакстанды “кооз жана бай мамлекет” деп атаган.

Ал эми январь айында президент Касым-Жомарт Токаев АКШнын демилгеси менен түзүлгөн Тынчтык кеңешинин уставына кол койгон. Кеңеш Газаны калыбына келтирүү жана аймактагы тынчтык процесстерин көзөмөлдөө үчүн эл аралык ресурстарды мобилизациялоого багытталган.

Автор: Айзада Кыдырмышева