Британия Ормуз кысыгын ачуу боюнча саммит өткөрүүнү сунуштады

Улуу Британия Ормуз кысыгы аркылуу кеме каттамын калыбына келтирүү маселеси боюнча саммит өткөрүүнү сунуштады. Бул тууралуу Politico басылмасы британдык расмий булакка таянып жазып чыкты.

Маалыматка ылайык, Ормуз кысыгындагы коопсуздук абалын жакшыртуу жана деңиз жолдорун кайра ачуу максатында кызыкдар өлкөлөр жакын арада жыйынга чогулушу мүмкүн. Саммитти өткөрүү демилгеси Британия тарабынан көтөрүлгөн.

Сунушталган жолугушууда негизинен деңиз коопсуздугу, эл аралык соода жолдорунун туруктуулугу жана аймактагы чыңалууну азайтуу маселелери талкууланары күтүлүүдө.

Ормуз кысыгы дүйнөдөгү эң маанилүү мунай ташуу жолдорунун бири болуп саналат. Ошондуктан анын жабылышы же чектелиши глобалдык экономикага олуттуу таасир тийгизиши мүмкүн.

Автор: Айзада Кыдырмышева