АКШ Ормуз кысыгындагы кырдаал боюнча союздаштардан көбүрөөк аракет күтөт

АКШ Ормуз кысыгындагы коопсуздукту камсыз кылуу маселеси боюнча союздаш өлкөлөрдөн активдүү катышууну күтүүдө. Бул тууралуу АКШнын НАТОдогу туруктуу өкүлү Мэттью Уитакер билдиргендигин чет элдик басылмалар жазды.

Анын айтымында, союздаш мамлекеттер бул багытта ишке кошула баштады, бирок АКШ мындан да көбүрөөк аракеттерди күтөт.

Буга чейин НАТОнун башкы катчысы Марк Рютте 22-мартта 22 мамлекеттен турган топ Ормуз кысыгындагы коопсуздукту камсыз кылуу боюнча мындан аркы аракеттерди пландап жатканын билдирген. Анын айтымында, бул топтун көпчүлүгүн НАТОго мүчө өлкөлөр түзөт, ошондой эле альянска кирбеген айрым мамлекеттер да катышууда.

Ошол эле учурда, конкреттүү иш-чаралар качан башталаары азырынча так айтыла элек.

Эксперттер белгилегендей, Ормуз кысыгы дүйнөлүк мунай ташуусунун маанилүү багыты болуп саналат, ошондуктан бул аймактагы коопсуздук глобалдык мааниге ээ.

Автор: Айзада Кыдырмышева