Иранда КСИРдин иликтөө башчысы Маджид Хадеми каза болгону тастыкталды

Иран Ислам революция корпусунун (КСИР) иликтөө башкармалыгы өзүнүн жетекчиси, генерал Маджид Хадеми каза болгонун расмий билдирди. Бул тууралуу чет элдик басылмалар жазышты.

Маалыматка караганда, окуя дүйшөмбү, 6-апрелде болуп, Иран тарап бул окуя үчүн АКШ жана Израилди күнөөлөдү.

Маджид Хадеми КСИРдин иликтөө башчысы катары 2025-жылдын июнунда дайындалып, буга чейин ошол кызматта болгон Мохаммад Каземини алмаштырган. Каземи мурда Израилдик соккулардын натыйжасында каза болгон. Хадеминин коопсуздук структураларындагы жалпы кызмат тажрыйбасы 50 жылга жакын.

Бул окуя Ирандын жогорку аскерий жетекчилигинин соңку убактагы жоготууларынын уландысы болуп эсептелет. Мисалы, 2025-жылдын июнунда Мохаммад Каземи жана КСИРдин командири Хосейн Салами каза болуп, 2026-жылдын мартында КСИРдин деңиз күчтөрүнүн командири Алиреза Тангсири жана Коргоо министрлигинин изилдөө борборунун жетекчиси Али Фуладванд каза болгон.

Автор: Айзада Кыдырмышева