Тегеран Вашингтон менен сүйлөшүү жүргүзүү шартын атады

Тегеран менен Вашингтондун Исламабаддагы сүйлөшүүлөрү АКШнын Иран портторуна блокадасы алынган соң ишке ашат. Бул тууралуу Ирандын БУУдагы туруктуу өкүлү Амир Саид Иравани билдиргенин ИРНА басылмасы жазды.

"Вашингтон деңиз блокадасын токтотоор замат, сүйлөшүүлөрдүн кийинки айлампасы Исламабадда өтөт деп ишенем",- деген ал журналисттердин суроолоруна жооп бергенде.

Буга чейин АКШнын президенти Дональд Трамп АКШ Иранга каршы жаңы соккуларды азырынча токтото турганын, бирок Иран портторуна деңиз блокадасын алып салбай турганын билдирген. Кийинчерээк ал америкалыктардын Иран портторуна блокадасын сактап калуу зарылдыгын, ансыз Тегеран менен келишим түзүлбөй турганын белгилеген.

АКШ администрациясы учурда Иран менен сүйлөшүү үчүн Пакистанга делегация жиберүүнү пландабаганын ырастаган. АКШ Ирандын макулдашылган сунушун күтөт.

Эске салсак, 12-апрелде Иран менен АКШ Исламабадда сүйлөшүү жүргүзүп, бирдиктүү чечимге келе алышкан эмес.

Автор: Айжанар Рыспек кызы
Фото: интернеттен алынды