АКШ менен Ирандын сүйлөшүүлөрү үзгүлтүккө учурагандан кийин алтындын баасы төмөндөдү

АКШ менен Ирандын ортосундагы сүйлөшүүлөрдүн ийгиликсиз аякташы дүйнөлүк рынокто алтындын баасына терс таасирин тийгизди.

Reuters агенттигинин маалыматына ылайык, мунайдын кымбатташы инфляция жана пайыздык чендер боюнча кооптонууну күчөтүп, алтын арзандай баштаган.

KCM Trade компаниясынын башкы аналитиги Тим Уотерер “тынчтык келишимине болгон үмүт азайып, мунайдын баасы кайра өсүп жатат” деп билдирген.

Маалыматка караганда, алтындын споттук баасы 1,2 пайыз төмөндөп, бир унциясы 4657 доллар болду. Ал эми АКШдагы июнь айындагы фьючерстер 1,4 пайыз арзандаган.

Мындай өзгөрүүгө Дональд Трамп Ирандын сунуштарына каршы чыккан билдирүүсү себеп болгон. Ошондой эле Ормуз кысыгындагы деңиз ташууларындагы көйгөйлөр жана дүйнөлүк мунай жеткирүүлөрүнө байланыштуу тынчсыздануулар мунай баасынын өсүшүнө түрткү берди.

Reuters белгилегендей, Иран менен согуш башталгандан бери алтындын дүйнөлүк баасы 8 пайыздан ашык төмөндөгөн.

Автор: Айзада Кыдырмышева