Неймар Бразилия курамасына чакырылганын угуп көзүнө жаш алды

Бразилиянын улуттук курамасынын жылдызы, “Сантос” клубунун чабуулчусу Неймар дүйнө чемпиондугунун тандоо оюндарына чакырылганын укканда эмоциясын жашыра алган жок.

Футболчу курам жарыяланган учурду видеого тартып алган. Анда Бразилия курамасынын жаңы башкы машыктыруучусу Карло Анчелотти оюнчулардын тизмесин окуп жатканда Неймардын ысымы аталат. Ошол учурда футболчу көзүнө жаш алып, толкунданып кеткенин көрүүгө болот.

Бразилиялык ЖМКлар Неймардын курамага кайтып келиши дээрлик чечилгенин буга чейин эле жазышкан. Бирок оюнчунун бул видеодогу реакциясы чакыруу анын өзү үчүн да өтө маанилүү болгонун көрсөттү.

Неймар акыркы мезгилде жаракаттардан улам көп убакыт футболдон алыстап калган. Ал жакында гана өзүнүн мурдагы клубу - Santos FC курамында кайрадан талаага чыгып, формасын калыбына келтире баштаган.

Күйөрмандар Неймардын улуттук курамга кайтып келиши Бразилия үчүн чоң күч болоруна ишенишүүдө. Айрыкча, 2026-жылкы дүйнө чемпиондугуна даярдык учурунда анын тажрыйбасы команда үчүн маанилүү роль ойнойт деп күтүлүүдө.