Ошто жол тескөөчүлөрдөн качкан 18 жаштагы айдоочу мас абалында экендиги аныкталды

Ошто жол тескөөчүлөрдүн мыйзамдуу талаптарына баш ийбей качкан айдоочу мас абалында экендиги аныкталды. Бул тууралуу ЖКККБнын Ош облусу боюнча башкармалыгы билдирди.

Маалым болгондой, бүгүн, 1-июнда саат 13:00 чамасында Кыргыз-Чек айылында токтоп турган Kia K5 үлгүсүндөгү унааны күмүш түстөгү Mercedes-Benz C200 үлгүсүндөгү унаа сүзүп, окуя болгон жерден Ош шаары тарапка качып кеткен.

Аталган унааны токтотуу максатында Куршаб, Таш-Арык, Тойчу айылынын бурулушу, Учкун жана башка көзөмөлдөө пункттарында тосуу чаралары көрүлгөн. Бирок айдоочу милиция кызматкерлеринин мыйзамдуу талаптарына баш ийбей, бир нече посттон токтобой өтүп кеткен.

Кийинчерээк Кыргыз-Чек постунда патрулдук унаа менен жол тосулган учурда да айдоочу токтобостон кызматтык унааны сүзүп өтүп, андан соң Портерди сүзүп барып токтоду.

Текшерүүнүн жүрүшүндө Mercedes-Benz C200 үлгүсүндөгү унаанын айдоочусу 18 жашта жана мас абалда экени аныкталды.

Учурда бул факты боюнча тиешелүү материалдар топтолуп, мыйзам чегинде териштирүү иштери жүргүзүлүүдө.