Бишкекте "Жаңы үйлөнгөндөргө бак отургузуу" долбоору башталды (видео)

"Бишкекжашылкурулуш" муниципалдык ишканасы жана GREEN AIR компаниясы "Жаңы үйлөнгөндөргө бак-дарак отургузуу" аттуу жаңы долбоорду ишке киргизгенин билдирди.

Мэриядан маалымдашкандай, долбоорго катышуу үчүн бак отургузула турган күнгө 2 жума калганда шаар мэриясынын расмий сайтындагы "Жаңы үйлөнгөндөргө бак отургузуу" бөлүмү аркылуу билдирүү калтыруу зарыл. Катышуучулар күндү, аймакты тандап, андан соң төлөмдү QR-код аркылуу жүргүзүшө алат.

Алгачкылардан болуп билдирүү калтырган 5 жаңы үйлөнгөн түгөйгө отургузуу үчүн бак-дарактар белекке берилери кошумчаланды. Билдирме калтыруу үчүн 0880 005123 номуруна байланышса болот. Долбоорго катышуунун баасы төмөнкүдөй:

10-апрелден 25-октябрга чейин жабык тамырлуу көчөттөрдү отургузуу үчүн 15 миң 500 сом;
10-марттан 10-апрелге чейин эрте жазда жана 26-октябрдан 25-ноябрга чейин күзүндө ачык тамырлуу көчөттөрдү отургузуу үчүн 7800 сом.

"Долбоор Бишкек шаарын жашылдандырууга, экологиялык абалды жакшыртууга жана жарандардын айлана-чөйрөгө болгон жоопкерчиликтүү мамилесин калыптандырууга багытталган",- деп билдирет мэрия.