Өзбекстанда түнкүсүн ызы-чуу салгандарга айып пул көбөйөт

Өзбекстанда тургундардын тынчын алган ызы-чуу үчүн айып пулдар көбөйтүлөт. Жаңы мыйзам кечээ, 11-сентябрдан тарта күчүнө киргенин жергиликтүү басылмалар жазышууда.

Биринчи жолу мыйзам бузган жаранга 1,32–2,2 миллион сум, ал эми кызмат адамдарына 4,4–6,6 миллион сум айып пул салынат. Бул сумма болжолдуу 9 миңден 32 миң сомго чейин.

Эгер мыйзам бузуу бир жыл ичинде кайталанса, жарандар 3,08 миллион сумга чейин, кызмат адамдары 8,8 миллон сумга чейин айып төлөшөт. Сом менен алганда 50-65 миң болот.

Ошондой эле нормадан ашык ызы-чуу чыгарган унаалардын айдоочуларына 440 миң сум айып пул каралган.

Жумуш күндөрү саат 23:00дөн 07:00гө чейин, ал эми дем алыш жана майрам күндөрү 22:00дөн 09:00гө чейин катуу ызы-чууга тыюу салынат.

Автор: Замира Ниязбекова