Курулушта мыйзам бузгандарга 1 миллион сом айып салынды (видео)

Бишкек шаарындагы бир катар курулуш объектилерин текшерүү учурунда мыйзам бузуулар аныкталды. Бул тууралуу бүгүн, 30-октябрда Курулуш министрлигинен билдиришти.

Маалыматка ылайык, рейддин алкагында төмөнкү объектилер текшерилди:

“Мүрөк” спорттук медицина жана реабилитация борбору;
Арча-Бешик конушу, Шербет көчөсү, 11 дарегиндеги 5 кабаттуу кеңсе имараты;
Карасаев көчөсү, 128 дарегиндеги 12 кабаттуу турак үй;
Көк-Жар айылындагы 16-тилкеде жайгашкан 9 кабаттуу турак үй;
Панфилов көчөсү, 11 дарегиндеги эмерек салону.

"Жыйынтыгында курулуш иштерин жүргүзгөн подряддык уюмдарга Укук бузуулар жөнүндө кодексинин 144-беренесине (Долбоорлоо жана куруу эрежелерин бузуу) ылайык жалпы суммасы 1 миллион сом айып пул салынды", - деп кошумчаланды маалыматта.