"Базардан 4 орун берем..." Ошто алдамчылыкка шектелген жаран кармалды

Ош шаарында ири өлчөмдөгү алдамчылыкка шектелген жаран кармалды. Бул тууралуу бүгүн, 13-ноябрда шаардык милициядан билдиришти.

Маалыматка ылайык, шектүү 2025-жылдын 24-июлунда 50 жаштагы аялга өзүн инвестор катары тааныштырып, "Жибек-Жолу" базарынан 4 соода ордун берүүнү убада кылган. Бул үчүн аялдан 40 миң доллар алып, бирок убадасын аткарбастан изин жашырган.

Бул факт боюнча 23 жаштагы шектүү кармалып, ага карата Кылмыш-жаза кодексинин 209-беренеси (Алдамчылык) менен кылмыш иши козголгон.

Соттун чечими менен ал 2 айга камакка алынган. Учурда тергөө амалдары улантылууда.

Автор: Меерим Кабылова