Төрт жылдан бери талаадагы жер төлөдө жашап жүргөн үй-бүлө (фоторепортаж)

Учурда үй-бүлөнүн маселесин кароону социалдык жактан колдоого алуучулар атайын комиссия түзүп колго алышууда.

"Бизге бул жер жагат. Үйүбүз жылуу. Балабызды алып кетип балдар үйүнө берип салышабы деп коркуп, жашырынып жүрчүбүз",- дейт үй ээси.

Короого 3 итти 2 күчүгү менен бирге багышат.

Нурия Лебедева учурда үй-жайсыз болгондуктан, курбусу Маринанын үй-бүлөсү менен бирге жашайт.

Бул жерди айылдын мергенчилер бирикмесинин кызматкерлери жолбун иттерди атып жүрүп байкашып, укук коргоо органдарына кабарлашкан.

Айланып эшигинин алдына чейин келмейинче байкабаган адамга жер төлө көрүнбөйт.

Александр кире бериштеги бул жайда уктайт.

Үйдүн эркеси Николай жана мышыгы Маша. "Алар дайым бирге жүрүшөт",- дейт апасы.

Үй-бүлөнүн уктоочу жайы

Үй ээси Александр: "Темир мешимди абайлап жагам. Эгер ашырып ийсем, үй Ташкент болуп кетет",- деп жылмайды.

Бул жерде Марина, курбусу Нурия жана уулу Николай бирге укташат.

Маша - Николайдын жакын досу жана эрмеги.

Жер төлөнүн дубал кошуп жасап алган алдыңкы бөлүгү ушундай көрүнүштө.

Электр жарыгы берилбегендиктен, шам жагып түн кечиришет.

Жер төлөнүн кожойкеси Марина "Эл бизге жардам берет. Алар эмне иш кылып бербейли, алдабай акчабызды берип, тамак-аштан кайрылышып турушат" деп азык-түлүк сактаган баштыктарын көрсөттү.

Сууну Ленин айылынан ташып келишет.

Үй-бүлө бул жерде өздөрүнө, сыртта багылган 3 ит, 2 күчүккө жана 1 мышыкка тамак даярдайт.

Узуну 4, туурасы 2 чарчы метр болгон жер төлөдө 4 адам күн кечиришүүдө.

Чүй облустук ички иштер башкы башкармалыгы жер төлөдө жашап жаткан үй-бүлө тууралуу маалымдаган. Жер төлө аталган облуска караштуу Аламүдүн районундагы Ленин айыл өкмөтүнүн аймагында негизги жолдон алысыраак жерде жайгашкан экен.

Алар жерди казып, ачык калган бөлүгүнө ылайдан дубал тургузуп, 2 бөлмөлүү үй кылып алып 4 жылдан бери күн кечирип келишкен. Үй ээси 39 жаштагы Александр ден соолугунун мүмкүнчүлүгү чектелген. Ал эми жубайы Марина 41 жашта. Булар менен бирге үйдө алардын 6 жаштагы Николай аттуу уулу жана Маринанын курбусу Нурия да жашайт.

Жер төлөдө жашап калганга чейин Ленин айылындагы Маринанын бир тууган эжесинин үйүндө баш калкалап келишкен. Ортодогу пикир келишпестиктен булардын үй-бүлөсү өзүнчө бөлүнүп кетүүгө мажбур болгон.

Учурда Калкты социалдык коргоого алуу бөлүмү, Жашы жете элек балдар менен иш алып баруу инспекциясы, укук коргоо органдары жана жергиликтүү өзүн-өзү башкаруу структурасынын кызматкерлери иш алып барышып, кичинекей Николайды мамлекеттин камкордугуна алууну сүйлөшүп жатышат.

Автор: Гүлжан Асанкожоева
Фото: Гүлжан Асанкожоева