Бишкектин вице-мэри: “Көчөгө туура эмес токтогон унааларды сүйрөтүп кетүүгө мыйзам жол бербей жатат”

Бишкек шаарында көчөлөргө туура эмес токтотулган автоунааларды эвакуатор менен алып кетүүгө мыйзам жол бербей жатат. Муну бүгүн, 18-февралда ЖКда өтүп жаткан парламенттик угууда шаардын вице-мэри Төрөбек Имашов билдирди. Айтымында, шаардагы автоунаалардын саны 320 миңге жетти. “Мен эки сунуш айтам: туура эмес токтотулган унааларды сүйрөтүп кетүүгө жол ачып берүү жана шаарда көп кабаттуу унаа токтотуучу жайларды көбөйтүү”,- деди Имашов. Бишкек шаарында калктын саны 1 миллион 300 миңге жеткенин да кошумчалады вице-мэр.

Айта кетсек, Жогорку Кеңеште жол кырсыктарынын санын азайтуу, айдоочулардын жоопкерчилигин күчөтүү маселеси боюнча парламенттик угуу өтүп жатат.

Автор: Автандил Добулбеков