Бишкек шаарынын мэри Кубанычбек Кулматов коллегиянын жыйынында мэрияда иштегендерди катуу сынга алды

“Мэрия акча сурай турган уюмга айланып бара жатат. Дотация алалы деп эле отурган чиновниктер бар. Каражатты кайдан алабыз? Бюджеттенби? Ал жерде акча жок. Биздин эң ири активибиз – Бишкек”,- деди ал.

Мэрдин айтымында, ал иштеген 1 айдын ичинде шаардагы башкармалык, департамент жана дирекциялардан алгылыктуу сунуш түшкөн эмес.

“Мага "ушундай кылалы" деп бирөө да келген жок. Силердин катыштыгыңар жокко эсе. Өзүңөрдү байкоочулардын көзү менен карап көрсөңөр”,- деди мэр.

Шаар башчы санитардык тазалоо иштеринде муниципалитет менен тыгыз иштешпеген акимдердин жумушун да сындады. Мындан сырткары жүйөлүү себептерден улам планды толтурбаган Салык кызматынын ишине жана унаа токтотуучу жайларга төлөм жыйналып жатканына нааразы экенин билдирип, тиешелүү башкармалыктарга тапшырма берди.

Автор: Айпери Ганыжан кызы