КТРК коррупциялык схемалардын алдын алуу боюнча ишеним телефон линиясын ачты

Маалымат каражаттары чуулгандуу аудиожазуудан улам “пара талап кылуу” боюнча шектелип жаткан Дана аттуу аял КТРКда менеджер катары иштеп келгенин, аны берүүнүн титрлери далилдеп турарын айтып чыгышкан. Бүгүн, 25-февралда журналисттер менен жолугушкан КТРКнын башкы директору Кубат Оторбаев бул боюнча да маалымат берди. Анда: “Берүүнү ишке ашырууда Дана Абдыбекова катышкандыгы аныкталды. Анын аты-жөнү “Аалам сырлары” берүүсүнүн менеджери катары титрлерде көрсөтүлгөн. КТРКга каалагандай кирип-чыгып жүргөнгө бул адамдын мүмкүнчүлүгү болгон. Аныкталган мындай фактылардан улам берүүнүн жетекчилери түшүндүрмө беришти. Мекеменин кызматкери болбогон адамды менеджер катары титрде көрсөтүү жана каалагандай кирип-чыгуу мүмкүнчүлүгүн беришкендиги үчүн “Аалам сырларынын” жетекчилигине дисциплинардык жаза колдонулат”,- деп айтып өттү Оторбаев.

Ошондой эле КТРК "пара талап кылуу" фактысын аныктоо боюнча кошумча аракеттерди көрүүдө. Телеканалдын кызматкерлери тарабынан "пара талап кылуу", "кызмат абалынан кыянаттык менен пайдалануу" фактыларын аныктоо үчүн жарандар менен түз байланыш бөлүмүн ачты.

Автор: Айпери Ганыжан кызы