Евромайданда митингчилердин алдында ырдаган украиналык ырчы Руслананы Мишель Обама эрдиги үчүн сыйлады

Сыйлык тапшыруу учурунда...

АКШнын президенти Барак Обаманын жубайы Мишель Обама кечээ, 4-мартта украиналык ырчы айым Руслананы адамдарды өнүктүрүүгө, аларга көмөктөшүүгө кошкон салымы үчүн ыйгарылуучу “International Women of Courage” ("Эрдик көрсөткөн айымдар") сыйлыгы менен сыйлады. АКШнын Мамлекеттик департаменти тарабынан жылына тапшырылуучу сыйлык Руслананын Евромайданда оппозиция тарабында болгону менен түшүндүрүлөт. Бул тууралуу чет элдик маалымат булактары кабарлайт.

Маалыматка ылайык, Руслана өмүрүнө коркунуч келгенине карабай Евромайданга барып, митингчилердин алдында ырдаган.

Сыйлык тапшыруу аземи АКШнын Мамлекеттик департаментинде өттү.

Кошумчалай кетсек, Руслана 2004-жылы “Евровидение” сынагын утуп алган. Кийин ал Украинанын Жогорку Радасына депутат болуп шайланган. Ал Майданга активдүү катышып, алгачкы апталардан тарта эл алдында Украинанын гимнин ырдап турган.

Эске салсак, 2011-жылы 8-мартта КРнын мурдагы Президенти Роза Отунбаева да бул сыйлыкка татыктуу болгон. Сыйлык тапшыруу аземи АКШнын Мамлекеттик департаментинде өткөн.