ЖКнын Эл аралык иштер боюнча комитети Бишкек шаарында ишке ашырылып жаткан объектилерди кыдырып чыкты

ЖКнын Эл аралык иштер боюнча комитети 4-мартта парламент тарабынан ратификацияланган эл аралык келишимдердин алкагындагы Бишкек шаарында ишке ашырылып жаткан объектилерди кыдырып, көрүп чыкты. Иш-чарага Бишкек шаарынын мэри Кубанычбек Кулматов, вице-мэр Төрөбек Имашев, Бишкек шаардык кеңешинин төрагасы Марат Аманкулов, Капиталдык курулуш башкармалыгынын башчысы Канчоро Ажекбаров, Капиталдык курулуштун коомдук-мамлекеттик башкармалыгынын начальниги Асхат Медетбек уулу, Бишкек троллейбус башкармалыгынын директору Геннадий Милицкий, “Бишкексууканал” өндүрүш-эксплуатациялык башкармалыгынын директору Асылбек Исаев катышты. Бул тууралуу бүгүн, 5-мартта ЖКнын басма сөз кызматы кабарлады.

Маалыматка ылайык, комитет мүчөлөрү бир катар ички түзүмдүк объектилердин, анын ичинде Анкара, Л.Толстой көчөлөрүндө, Алтын-Ордо жаңы конушунда салынган жаңы көпүрөнү көрүп чыгышты. Ошону менен катар Бишкек троллейбус башкармалыгында, “Орто-Алыш” суу сактоочу жайында болушту. Объектилерди кыдыргандан кийин комитет мүчөлөрү жана Бишкек шаардык кеңешинин депутаттары биргелешкен жыйын өткөрүп, шаардын актуалдуу делген көйгөйлөрүн жана биргелешкен иштин багыттарын талкуулашты.

Бишкек шаардык кеңешинин депутаттары Бишкек мэриясынын ишиндеги бир катар көйгөйлөрдү тизмектешти. Шаар жетекчилигинин ыйгарым укуктарын кеңейтүү жана капиталдык курулуштарга бюджетти көбөйтүү зарылдыгын ортого салышты.

Эл аралык иштер боюнча комитеттин төрагасы К.Иманалиев Жогорку Кеңеш менен Бишкек шаардык кеңешинин ортосунда тутумдуу кызматташуу түзүлүшү керектигине токтолду. Шаардык кеңеш шаардыктардын күнүмдүк көйгөйлөрүн чечүү үчүн шаардык кызматтарга иштерди багыттоо менен маанилүү иштерди аткарып жатканын билдирди. Ошондой эле ал шаар жетекчилигинин ыйгарым укуктарын кеңейтүү жана капиталдык курулуштарга бюджетти көбөйтүү маселесин кароого даярдыгын кошумчалады. Депутат Жылдызкан Жолдошова шаардык долбоорлорду каржылоо маселелерин жөнгө салуу үчүн бардык донорлорду жана мэрия өкүлдөрүнүн бирдиктүү жолугушуусун уюштурууну сунуштады. Мындан сырткары ал шаарды жашылдандыруу, аймактарын тартипке салуу маселелерине көбүрөөк көңүл буруу керектигин белгиледи. Шаар бюджетин көбөйтүү зарылдыгын колдогон депутат Бахтияр Кадыров социалдык объектилердин жетишсиздигин айтты. Жолугушуунун соңунда Бишкек шаарынын мэри К.Кулматов жемиштүү жолугушуу болгонун жана кызматташуу сунуштарынын маанисин белгилеп, Жогорку Кеңештин депутаттарына ыраазычылыгын билдирди.

Автор: Дамира Арстанова