Кыргызстанда 2012-жылы 3 миллиард 568 миллион сомдук каржылык мыйзам бузуу фактылары болгону аныкталды

Жогорку Кеңеште бүгүн, 12-мартта 2012-жылдын республикалык бюджетинин аткарылышы жөнүндө өкмөттүн маалыматы угулуп, 2-окууда добуш берүүгө жөнөтүлдү. Жыйынга өкмөт мүчөлөрү, мамлекеттик органдар менен мекемелердин жетекчилери катышты.

Каржы министри Ольга Лаврованын айтымында, бюджеттин жыйынды кирешелери 77 миллиард 601 миллион 1 миң сомду же 96,9 пайызды түзгөн, ал эми республикалык бюджеттин жыйынды чыгымдары 71 миллиард 703 миллион 3 миң сомго же 98,4 пайызга аткарылган.

“Кумтөр” кенин эсепке албаганда да, өлкө экономикасы өсүптүр. Бир катар тышкы карыздар кечилгендиктен, тышкы карыздарды тейлөө жаатында 400 миллион сом бошогондуктан, ал башка багыттарда пайдаланылды. Жыл аягында эл аралык каржы уюмдарынан келип түшкөн 2 миллиард өлчөмүндөгү каражат толугу менен 2013-жылдын бюджетине чегерилди.

Эсептөө палатасы тарабынан 3 миллиард 568 миллион сом өлчөмүндөгү каржы тартибин бузуу фактылары аныкталып, анын ичинен 2 миллиард 925 миллион сому кайра кайтарылууга жатат.

Талкууда депутаттар уурдалган же өз багытында колдонулбаган бюджеттик каражаттар боюнча табылган фактыларды укук коргоо органдары аркылуу ордун толтуруу, күнөөлүү жетекчилерди жоопкерчиликке тартуу зарылдыгын айтышты.

Автор: Автандил Добулбеков