Президент Алмазбек Атамбаев өкмөттү отставкага кетирүү боюнча жарлыкка кол койду

Президент Алмазбек Атамбаев Кыргыз Республикасынын Өкмөтүнүн отставкасы жөнүндө жарлыкка кол койду. Бул тууралуу бүгүн, 19-мартта президенттин басма сөз кызматы билдирди.

Маалыматка ылайык, өлкө башчы КРнын Президентинин аппаратынын жетекчиси Данияр Нарымбаевди кабыл алган. Ал Алмазбек Атамбаевге "Ырыс алды - ынтымак" парламенттик көпчүлүк коалициясынын лидери Феликс Куловдун бул коалиция парламенттик көпчүлүктүн статусун жоготкондугу тууралуу расмий катын тапшырды.

Парламенттик көпчүлүктүн коалициясы курамдан «Ата Мекен» фракциясынын чыгуусуна байланыштуу өз ишмердигин токтотту.

Жарлыкка ылайык, Кыргыз Республикасынын Жогорку Кеңешинин КСДП, «Ар-намыс» жана «Ата Мекен» фракцияларынын ортосундагы 2012-жылдын 3-сентябрында макулдашууга ылайык түзүлгөн Кыргыз Республикасынын Өкмөтү отставкага кеткен болуп эсептелинет.

Жарлыкка ылайык, премьер-министр, биринчи вице-премьер-министр, вице-премьер-министр, Кыргыз Республикасынын Өкмөтүнүн мүчөлөрүнүн, ошондой эле администрациялык мекемелеринин жетекчилеринин кызмат орундарын ээлеген адамдар өкмөттүн жаңы курамы түзүлгөнчө мурда ээлеген кызматтарында Кыргыз Республикасынын Өкмөтүнүн мүчөлөрүнүн жана администрациялык ведомстволорунун жетекчилеринин милдеттерин аткарууну улантышат.