Өмүрбек Текебаев: “Конституцияда бийлик бутактарынын ыйгарым укуктары туура бөлүштүрүлгөнүн мезгил тастыктап жатат”

Конституцияда бийлик бутактарынын ыйгарым укуктары жана милдеттери туура бөлүштүрүлгөнүн мезгил өзү тастыктап жатат. Муну “Ата Мекен” фракциясынын лидери Өмүрбек Текебаев 19-мартта Ысык-Көлдө шайлоочулар менен жолугушууда айтты. “Буга өлкөдөгү коррупциялык кылмыштарга жана уюшкан кылмыштуу топторго каршы күрөштүн жүрүшү жакшы мисал болот. Мурдагыдай бири-биринин кылмышын жаап-жашыруу жосундарынан акырындап арылып баратабыз. Анткени “Ата Мекен” фракциясы өз шайлоочуларына дал ушундай кескин чараларды көрүүгө убада берген”,- деди Текебаев.

Өмүрбек Текебаев бардык бийлик бутактары тарабынан биргелешип жасалган мамлекеттик башкаруу системин өнүктүрүүгө, социалдык-экономикалык маселелерди чечүүгө багытталган иш-чаралар жаатында да маалымат берди. “Ата Мекен” фракциясы элдин жашоо-турмушун оңдоо үчүн 60тан ашык мыйзам долбоорун иштеп чыкканын билдирди депутат.

Оор кылмыштарды кечирбөө боюнча ЖКда жакында кабыл алынган мыйзам тууралуу: “Эл арасында жандуу талкуу жараткан бул мыйзам аркылуу коррупциялык жана айрым өтө оор кылмыштарды жасаган адамдардын, кылмыш жоопкерчилигинен качып жүргөн аткаминерлердин кылмыш жоопкерчилигинен биротоло кутулуп кетүүсүнө бөгөт коюлат”,- дейт эл өкүлү.

Автор: Автандил Добулбеков