Нарын. Мыкты айыл өкмөтү аныкталды

Нарын облусунда 2 жылдан бери айыл чарбасын өнүктүрүү максатында “Мыкты айыл өкмөтү” кароо-сынагы өткөрүлүп келет. Жыл жыйынтыгы катары быйыл да беш райондун айыл өкмөттөрү ат салышып, жеңүүчүлөр аныкталды. Баш байгени жеңип алган Нарын облусуна караштуу Дөбөлү айыл өкмөтү Хонда-Одиссей үлгүсүндөгү автоунаага ээ болду. Ал эми 1-орунду Жумгал районуна караштуу Байзак айылы алып, Дубайга жолдомо утуп алды. 2-орунду Ак-Талаа районунун Коңорчок айыл өкмөтү алып, губернатордун II даражадагы диплому жана 30 миң сом акчалай сыйлык менен сыйланды. 3-орунду Кочкор районунун Талаа-Булак айылы камсыз кылып, губернатордун III даражадагы диплому жана 20 миң сом акчалай сыйлыкка ээ болду. Мындан сырткары кызыктыруучу сыйлыкка 6 айыл өкмөт татып, 10 000 сомдон акча каражаттарын жеңип алышты. “Мыкты айыл өкмөтү-2012” кароо-сынагынын баш байгелерин тапшыруу аземине Кыргыз Республикасынын Вице-премьер-министри Тайырбек Сарпашев келип катышты.

Автор: Гүлжан Асанкожоева