"Төрөт үйүнөн бала уурдаган" деген айып менен 15 жылга эркинен ажыратылган дарыгердин жакындары апелляциялык арыз жазышты

"Мамырканова №4-төрөт үйүнөн наристенин уурдалышына күнөөлүү эмес",- дешет жакындары. Бул тууралуу алар бүгүнкү маалымат жыйынында билдиришти. "Анын күнөөсү сотто такталган жок. Бирок ага карабай ал 15 жылга кесилип кетти. Ымыркайлар уурдалган күнү Мамырканова төрөт үйүндө болгон эмес. Андыктан биз апелляциялык арыз жаздык. Себеби негизги күнөөлүүлөр жазасын албай калышты",- дейт жактоочу Жаныбек Нарынкулов.

Эске сала кетсек, өткөн жылдын 5-ноябрында Бишкектеги №4-төрөт үйүнөн ымыркай уурдалганы маалымдалган. Кийин 10 күнгө жетпей ымыркай Асанбай кичи районунан табылган. Аталган кылмышка шектүү катары эки дарыгер айым жана ымыркайды сатып алган аял кармалган эле. Кылмышка шектүү болгон Нуржан Макенова, Шарапат Мамырканова жана Бегайым Алиеванын иши боюнча сот отуруму 19-июнда болгон. Соттун чечимине ылайык, Бегайым Алиева менен Шарапат Мамырканова 15 жылга эркинен ажыратылышса, Нуржан Макеновага 270 миң сом айып пул салынган.