1-сентябрда “№4-төрөт үйүндө жаңы төрөлгөн ымыркайды саткан” деп айыпталып жаткандардын иши боюнча сот отуруму уланат

1-сентябрда Бишкек шаардык сотунда “№4-төрөт үйүндө жаңы төрөлгөн ымыркайды саткан” деп айыпталып жаткандардын иши боюнча сот отуруму уланат. Бул тууралуу бүгүн, 29-августта Жогорку Соттон билдиришти.

Эске салсак, өткөн жылдын 5-ноябрында Бишкектеги №4-төрөт үйүнөн ымыркай уурдалганы маалымдалган. Кийин 10 күнгө жетпей ымыркай Асанбай кичи районунан табылган. Аталган кылмышка шектүү катары эки дарыгер айым жана ымыркайды сатып алган аял кармалган эле. Кылмышка шектүү болгон Нуржан Мекенова, Шарапат Мамырканова жана Бегайым Алиеванын иши боюнча сот отуруму 19-июнда болгон. Октябрь райондук сотунун чечимине ылайык, Бегайым Алиева менен Шарапат Мамырканова 15 жылга эркинен ажыратылышса, Нуржан Мекеновага 270 миң сом айып пул салынган.

Мындай чечимге макул болбогон жактоочулар Бишкек шаардык сотуна апелляциялык арыз жолдошкон.

Автор: Бекжан Рыскулов