Асия Сасыкбаева Түрк-Америка федерациясынын делегациясы менен жолугушту

Жогорку Кеңештин төрагасынын орун басары Асия Сасыкбаева 24-сентябрда АКШнын Орто Батышындагы вице-президенти Билал Экшили башында турган Түрк-Америка федерациясынын делегациясы менен жолугушту. Вице-спикер делегация өкүлдөрүнө ар жылы өткөрүлүп жаткан Кыргыз-Америка экономикалык форумунун 2-жыйынын уюштуруп жаткандыгы үчүн ыраазычылык билдирди. “Мындай форумдар АКШнын жана башка өлкөлөрдүн коомчулугуна Кыргызстан, анын парламенттик демократияны өнүктүрүүдөгү жетишкендиктери жөнүндө кеңири маалымат берүү менен Кыргызстан-Америка мамилелерин өнүктүрүүгө өз салымын кошот. Өлкөлөр ортосундагы экономикалык кызматташтыкты өнүктүрүүгө көмөк көрсөтөт”,- дейт Сасыкбаева.

Билал Экшили кыргыз-америка экономикалык форумуна болгон даярдыктарга канааттангандыгын айтты. “Биз мындан ары дагы бул багыттагы иштерди өткөрө алабыз деп ишенебиз”,- дейт ал.

Жолугушууда билим берүү жаатындагы кызматташтык маселеси да талкууга алынды. Сасыкбаева студенттерди, окутуучуларды жана илимий чөйрөнүн кызматкерлерин өз ара алмашып туруу аракеттерин жандандыруу сунушун берди.

Маалымат үчүн: 2013-жылдын 20-ноябрында Вашингтон шаарында Жогорку Кеңештин депутаттарынын, Кыргызстандын бизнес шериктештигинин өкүлдөрүнүн катышуусунда ар жылдык Кыргыз-Америка бизнес форуму өткөн. Бизнести сүрөө жаатында 200 өкүл, анын ичинде эки өлкөнүн парламенттин, мамлекеттик органдардын, жеке сектордун, академиялык чөйрөнүн, ошондой эле эл аралык, коомдук, изилдөө-талдоочулук институттарынын өкүлдөрү катышкан бул форум ири иш-чаралардын бири болгон.

Автор: Автандил Добулбеков