Мурда оор кылмышы үчүн соттолгондордун талапкер катары шайлоолорго катышуусу чектелет

Бүгүн, 25-сентябрда Жогорку Кеңеште айрым талапкерлердин шайлоого катышуусуна чектөө коюу максатында депутаттар тобу тарабынан иштелип чыккан мыйзам долбоору экинчи окууда кабыл алынды.

Демилгечилердин бири Исмаил Исаковдун айтымында, соттолгондугу жоюлган же алынып салынгандыгына карабастан жана башка өлкөнүн жарандыгы бар, оор жана өзгөчө оор кылмыштарды жасагандыгы үчүн соттолгон адамдар президенттикке, Жогорку Кеңештин депутаттыгына, жергиликтүү кеңештердин депутаттыгына, шаарлардын мэрине, айыл өкмөтүнүн башчысына шайланууга жана райондун акимдигине дайындалууга укуктуу эместиги, ал эми жогорку билими бар Кыргызстандын ишке жарамдуу жараны шайлана ала тургандыгы тууралуу жобо сунушталууда.

Ошондой эле саясий кызмат орундарынын жана жогорку административдик кызмат орундарынын жетекчилери, мамлекеттик кызматка теңдештирилген айрым кызматкерлердин жашыруун маалымат алууга мүмкүнчүлүгүнүн бар экендигин эске алуу керек. Андыктан кызматкерлердин жашыруун деп эсептелген маалыматтарды алууга мүмкүнчүлүктөрү бар. Мамлекеттик жана муниципалдык кызматка байланышкан чектөөлөр да ошол себептүү киргизилген, ага ылайык, мамлекеттик жана муниципалдык кызматкерге жергиликтүү кеңештин депутаттыгына шайланууга тыюу салынат.

Автор: Жамалидин Парманкулов