Айдоочулук күбөлүктү алууда жарандардын сынакка өз алдынча даярданышын токтото турган мыйзам долбоору 1-окууда колдоо тапты

Жогорку Кеңештин 1-октябрдагы жыйынында айдоочулук күбөлүктү алууда жарандардын сынакка өз алдынча даярданышын токтотууга багытталган мыйзам долбоору 1-окууда колдоо тапты. Азыркы тапта "КРнын жол кыймылы жөнүндө" мыйзамда өз алдынча даярдыктар өтүп, бирок аткарган ишинин мүнөзүнө байланыштуу же башка себептерден улам белгиленген тартипке ылайык сабактарга катыша албай калган адамдарга өзгөчө тартип менен сынак берүүгө уруксат берилет. Мамлекеттик каттоо кызматына кирген тийиштүү департаменттин сынакка кирүүгө уруксат бериши коррупциялык көрүнүштөрдүн пайда болушуна мүмкүндүк түзүп жатканы айтылды.

Мыйзам долбоору кабыл алынганда өкмөттүн токтому менен бекитилген сынактарды кабыл алуу, жарандарга айдоочунун күбөлүгүн берүү жана автоунааларды башкарууга айдоочуларга уруксат берүү тартиби жөнүндө жобого жана Мамлекеттик каттоо кызматынын алдындагы Транспорттук каражаттарды жана айдоочулук курамды каттоо департаменти жөнүндө жобого тийиштүү өзгөртүүлөр киргизилет.

Автор: Автандил Добулбеков