"Республика" фракциясы "Ак-Кеме" мейманканасынын 11 миллион доллар карызын төлөө фактысы боюнча депутаттык комиссия түзүү чечимин кабыл алды

Бүгүн, 3-октябрда парламенттеги “Республика” фракциясында Бишкектеги “Ак-Кеме” мейманканасы боюнча “Систем Мюхендислик Иншаат ве Тижарет А.Ш.” деген түркиялык ишканага карыздарды төлөөгө мамлекеттик бюджеттин акчасын пайдалануу маселеси каралды. Жыйынга журналисттер катыштырылган жок, жабык форматта каралды. Соңунда аталган ишканага карызды төлөөгө мамбюджеттин эсебинен 11 миллион доллардын төлөнүшү тууралуу өкмөт өкүлдөрүнө укуктук баа берүү боюнча Башкы прокуратурага тапшырма берилди. Бул факт боюнча депутаттык комиссия түзүү чечими да кабыл алынды.

Маалыматка таянсак, 1990-жылдардын башында Түркия Кыргызстанга 49,2 миллион доллар көлөмүндө кредит берген. Бул боюнча келишимдин мөөнөтү 2011-жылы бүткөн. Алынган насыянын жарымы коммерциялык түзүмдөргө бөлүнүп, анын ичинде “Ак-Кеме” (“Пинара”) мейманканасы да болгон. Ага 8,7 миллион доллар бөлүнгөнү айтылды. 1993-жылы каражат “Ак-Кеме” мейманканасынын курулушуна жумшалган. Аталган долбоор “Ак-Кеме” ЖАКы жана “Систем Мюхендислик Иншаат ве Тижарет А.Ш.” ишканасы тарабынан ишке ашырылган. Кредиттин көлөмү пайыздарын кошкондо 11 миллион долларга чыгып, өкмөт аталган сумманы толугу менен которуп берген.

Автор: Автандил Добулбеков