Кыргызстанда шашылыш жана жаңылыш саясий чечимдерди кабыл алуудан куткара турган систем түзүү сунушталууда

Кыргызстандагы ченемдик-укуктук базага эффективдүү мониторинг жүргүзүү системин түзүү шашылыш жана жаңылыш саясий чечимдерди кабыл алуудан куткарат. Жогорку Кеңештин депутаты Наталья Никитенко ушундай пикирде. “Мониторинг жүргүзүү жана баалоо механизми эксперттер менен жарандык коомчулукту тартуу менен мамлекеттик саясаттын, ченемдик-укуктук актылардын натыйжалуулугу боюнча маалымат берүүгө шарт түзөт”,- дейт депутат.

Сунушталган системдин эки максаты бар: ченемдик-укуктук база канчалык деңгээлде иштээрин аныктоо жана документтердин жетимдүүлүгүн камсыздоо. “Башкача айтканда, жарандар документтер менен тааныша алгандай кылып сапатты баалоонун жыйынтыктарын ар дайым жарыялап туруу зарыл”,- дейт ал.

Айта кетсек, быйыл сентябрда Бишкек шаарында “Өнүктүрүү үчүн баалоо: ишке киргизүүдөн таасир этүүгө” аттуу конференция өтүп, анда эксперттер менен аналитиктердин, жарандык коомдун потенциалын тартууга көмөктөшүүчү системди түзүү талкууланган.

Автор: Автандил Добулбеков