Эбола вирусуна каршы күрөшүүгө Африкага Кыргызстандан да адистер кеткени айтылууда

Эбола вирусуна каршы күрөшүүгө Африка өлкөлөрүнө Кыргызстандан да медицина кызматкерлери кетишиптир. Бул тууралуу депутат Сайдулла Нышанов бүгүн, 13-октябрда Жогорку Кеңештин Агрардык саясат, суу ресурстары, экология жана региондук өнүгүү комитетинин жыйынында билдирди.

Нышанов мындай маалыматты тактоо үчүн саламаттык сактоо министринин орун басарына кайрылды. "Мендеги маалыматтар боюнча, учурда Африка өлкөлөрүндө күч алып жаткан Эбола вирусу менен күрөшүүгө Кыргызстандан да адистер кетишиптир. Министрликте бул боюнча маалымат барбы? Дегеле Кыргызстан аталган вируска каршы кандай аракеттерди көрүп жатат?"- деп суроо берди депутат.

Вируска каршы аракеттенүү үчүн учурда чек ара өтмөктөрүндө 5 медициналык көзөмөл пункту иштеп жатканын айткан саламаттыкты сактоо министринин орун басары адистердин Африкага кеткени боюнча министрликте расмий маалымат жок экенин билдирди.

Айта кетсек, Батыш Африканын бир катар өлкөлөрүндө аталган вирус күч алып, андан миңдеген адам каза тапты. Дартты жеңе турган дары азырынча табыла элек.

Автор: Жамалидин Парманкулов