“Ата Мекен” фракциясы энергетикадагы бир катар жетекчилерди кызматтан алууну сунуштады

Парламенттеги "Ата Мекен" фракциясы азыркы энергетикалык кырдаал боюнча билдирүү жасады. Анда тармактагы коррупция үчүн бир катар жетекчилердин жоопкерчилигин кароо керектиги айтылат. Камбар-Ата 2 ГЭСинин курулушун улантууга убагында акча бөлүнүп, аны айрым жетекчилер "максимдик" жана "ширшовдук" схемалар аркылуу ар кайсы фирмалардын эсебине которуп, мамлекетке 1 миллиард 230 миллион сомдук зыян келтирилгени айтылды. Бул ишке күнөөлүүлөргө айып тагылган, бирок 2012-жылкы мунапыстын негизинде алардын көбүнүн иши кыскарып, кийин алардын айрымдары кайра жетекчилик кызматтарга дайындалышкан. Алар:

Бектурсун Качканкулов, "Камбар-Ата ГЭС-2" ААКнын башкы директору;

Осмонбек Бакиев, Бишкек жылуулук электр борборунун директорунун орун басары;

Акбаралы Кудайбердиев, "Камбар-Ата ГЭС -2" ААКнын башчысынын орун басары;

Осмон Качкынбаев, "Нарынгидроэнергострой" ишканасынын директору.

"Ата Мекен" фракциясы энергетикадагы азыркы кырдаалды эске алып, жогорудагы жетекчилерди кызматтан бошотууну, аларды кызматка дайындаган жетекчилердин жоопкерчилигин кароону сунуштады.

Автор: Автандил Добулбеков