Алмазбек Атамбаев: "Журналисттин эрдиги анын чындык, акыйкаттуулук жана сөз эркиндиги үчүн күрөштө билинет"

Өлкө башчы Алмазбек Атамбаев 27-октябрда жарандык милдетин жана кызматтык парзын аткарууда көрсөткөн каармандыгы жана эрдиги үчүн белгилүү журналист Сыргак Абдылдаевди Эрдик медалы менен сыйлаган.

Алмазбек Атамбаев менен журналист Сыргак Абдылдаев өлкөдөгү коомдук-саясий маселелерди, коррупция менен күрөш жана ар кайсы тармактагы реформалардын иш жүзүнө ашырылып жатканын талкуулашты.

Мамлекет башчы өлкөнүн демократиялык жактан өнүгүүсүндө ММКнын ролу өзгөчө экенин белгиледи. Ошондой эле мындан ары да Кыргызстандагы сөз эркиндигинин өнүгүшү үчүн шарт түзүлөрүн кошумчалады. Ал өз сөзүндө: "Журналисттин эрдиги анын чындык, акыйкаттуулук жана сөз эркиндиги үчүн күрөштө билинет. Анын жумушу өлкөнүн кызыкчылыгы үчүн болушу керек",- деди. Президент Сыргак Абдылдаевге бекем ден соолук каалап өттү. Бул тууралуу 28-октябрда президенттин басма сөз кызматы билдирди.

Журналист Сыргак Абдылдаев “Репортёр Бишкек” гезитинде иштеп жаткан учурда ага кол салуу болуп, анын денесинин 22 жерине бычак сайылганы аныкталган. Ал 2009-жылы өлкөдөн чыгып кеткен. Учурда Швециянын Эстерсунд шаарында жашайт.

Автор: Айпери Ганыжан кызы
Фото: Султан Досалиев