Мамлекеттик салык кызматында бир катар кадрдык өзгөрүүлөр болду

Мамлекеттик салык кызматында бир катар кадрдык өзгөрүүлөр болду. Тийиштүү буйрукка аталган кызматтын төрагасы Замирбек Осмонов кол койгонун мекеменин басма сөз кызматы 18-ноябрда билдирди. Өзгөрүүлөр төмөнкүдөй:

Мамлекеттик салык кызматынын Манас району боюнча башкармалыгынын жетекчиси Алмазбек Жайнаков ишине себепсиз чыкпаганы үчүн кызматынан бошотулду.

Мамлекеттик салык кызматынын Чүй району боюнча башкармалыгынын жетекчиси Сарылбек Курмашов октябрь айында салык топтоо планын аткарбаганы үчүн кызматтан алынды.

Мамлекеттик салык кызматынын Түндүк аймактар аралык башкармалыгынын (Чүй жана Талас облустары) жетекчиси Замирбек Мамбеткулов 2014-жылдын 10 айында салык топтоо планын толук аткарбаганы үчүн кызматынан төмөндөтүлүп, Мамлекеттик салык кызматынын Манас району боюнча башкармалыгынын жетекчиси болуп дайындалды.

Мамлекеттик салык кызматынын Түндүк аймактар аралык башкармалыгынын башчысынын орун басары Камалидин Халилов ээлеген кызматынан төмөндөтүлүп, ошол эле башкармалыктын бөлүм башчысы болуп дайындалды. Бошогон кызмат ордуна Мамлекеттик салык кызматынын Сокулук району боюнча башкармалыгынын жетекчиси болуп эмгектенген Бакытбек Молдокасымов бекитилди.

Мындан сырткары сынактык тандоолордон кийин Сагынбек Жээнбеков Мамлекеттик салык кызматынын Түштүк аймактар аралык башкармалыгынын жетекчисинин орун басары, Фатима Казакова борбордук аппараттын бөлүм башчысы, Абдымиталип Жакыпов Мамлекеттик салык кызматынын Араван району боюнча башкармалыгынын башчысынын орун басары болуп дайындалышты.