Казакстан чек арада кармалып турган, күйүүчү май жүктөлгөн Кыргызстандын вагондорунун маселесин кароону тездетет

Бүгүн, 15-декабрда премьер-министр Жоомарт Оторбаев Шанхай Кызматташтык Уюмуна мүчө өлкөлөрдүн өкмөт башчылар кеңешинин алкагында Казакстандын премьер-министри Карим Масимов менен жолугушту. Өкмөт башчылары суу-энергетикалык, айыл чарба, чек ара, темир жол жана транспорттук инфраструктураны өнүктүрүү, эки өлкөнүн маданий-гуманитардык кызматташуусун активдештирүүнү талкуулашты.

"Акыркы кездерде кыргыз-казак кызматташуусу тийиштүү динамикага жана практикалык багытка ээ болуп, активдүү саясий-экономикалык баарлашуу орун алууда. Шериктеш мамлекеттердин демилгелери ар түрдүү эл аралык уюмдарда жана интеграциялык бирикмелерде активдүү колдоого алынууда",- деди Оторбаев.

Кыргызстандын Евразиялык экономикалык биримдикке кирүүсүнө даярдык көрүүгө жардам көрсөтүп жатканы үчүн ыраазычылык билдирди.

Тараптар "Луговая" станциясындагы күйүүчү-майлоочу майлар жүктөлгөн вагондордун кармалып турушун талкууга алышты. Жоомарт Оторбаев бул маселенин тез арада чечилерине ишенерин билдирди. Карим Масимов Казакстандын тийиштүү органдарына аталган маселенин чечилишин тездетүү тапшырмасын берди.

Автор: Автандил Добулбеков