Кыргыз өкмөтү өлкө аймагындагы жапайы жаныбарлардын санын эсептей албай жатат

Бүгүн, 26-декабрда Бишкек шаарында Жаратылыш ресурстарын сарамжалдуу пайдалануу департаментинин жыл жыйынтыгын чыгарууга багытталган жыйынында өлкөдөгү жапайы жаныбарлардын санын эсепке алуу кыйынга туруп жаткандыгы айтылды. Бул маалыматты департаменттин жетекчиси Алмаз Мусаев билдирди.

“Учурда жапайы жаныбарлардын санын эсепке алуу кыйын болууда. Маалыматтарга ылайык, алардын саны 2010-жылдан тарта 3-4 миңге өскөн. Чындыкка келгенде, мисалы, кийик жана сейрек кездешүүчү жандыктардын саны жыл санап азайып жатканы байкалууда. Ошондой эле аймактарда карышкырдын саны өсүп, айылдарга чейин кирип жатканы баарыбызга белгилүү. А бирок аймактардагы айрым өкүлдөр буга чейин карышкырлардын азайганын айтышкан болчу. Тилекке каршы, айрым учурларда берилген маалыматтар коомчулукта кайчылаш пикирлерди жаратууда. Ошол себептен сандар тууралуу маалымат берерде тагыраак бололу”,- деди Алмаз Мусаев.

Жыйындын алкагында Баткен облусунда бал челектерди уюштуруу иштери аксап жатканы, мыйзамсыз аңчылык күч алып, алар менен болгон соттук териштирүүлөрдө алар кыйын жактоочуларды жалдап алып жаткандыгы айтылды.

“Эң негизгиси, биздин департаменттин өкүлчүлүктөрүндө материалдык базаны чыңдоо боюнча иш-аракеттерди ыкчам жүргүзүү зарыл. Жакында болуп өткөн текшерүүлөрдүн натыйжасында токойлорду көзөмөлдөгөн кызматкерлерибиз “GPS-навигаторлорду” колдонгонду билбей тургандыгы аныкталды. Бул ишти артка тартып жаткандыктын белгиси”,- деп кошумчалады А.Мусаев.

Автор: Мальвина Уметбекова