Болот Миңжылкыевдин мемориалдык айкели Санкт-Петербург шаарына орнотулат

Жогорку Кеңештин Билим берүү, илим, маданият жана спорт боюнча комитетинин бүгүнкү, 30-декабрдагы жыйынында СССРдин Эл артисти, Токтогул атындагы Мамлекеттик сыйлыктын лауреаты Болот Миңжылкыевдин мемориалдык айкелин орнотуу жөнүндө маселе каралып, жактырылды. Маселенин демилгечиси - депутаты Каныбек Иманалиев.

Комитет төрагасы Каныбек Осмоналиевдин айтымында, дүйнөлүк опера искусствосуна жана кыргыз маданиятына зор салым кошкон Болот Миңжылкыевдин эстелиги Орусиянын Санкт-Петербург шаарындагы Мариинск театрына орнотулмакчы. Ал өмүрүнүн акыркы күндөрүндө аталган театрда солист болуп иштеген.

Комитет мүчөлөрү демилгени Жогорку Кеңештин кароосуна сунуштоо чечимин кабыл алышты.

Айта кетсек, 2015-жылы Болот Миңжылкыевдин туулганына 75 жыл болот. Ага "СССРдин Эл артисти" жана "Кыргыз ССРинин Эл артисти" деген наамдар ыйгарылган. Бир нече орден-медалдар менен сыйланган. Кыргыз ССР Жогорку Советинин депутаты болуп шайланган.

Автор: Жамалидин Парманкулов