Бишкекте "41 жаштагы аялды өлтүрүп, Чоң Чүй каналына таштап жиберген" деп шектелгендер кармалышты

Маркум Татьяна Оропаеванын өлүмүнө шектүү катары эки адам кармалды. Бул тууралуу Свердлов райондук ички иштер башкармалыгынын ага тергөөчүсү Гүлмира Мукамбетова 9-февралда Бишкекте өткөргөн маалымат жыйынында билдирди.

"Өткөн жылы 20-октябрда Энергетиктер кичи районунун аймагынан, Чоң Чүй каналынан 41 жаштагы Татьяна Оропаеванын жансыз денеси табылган. Татьяна 17-октябрдан 18-октябрга караган түнү өз үйүндө киши колдуу болуп көз жумган. Анын өлүмүнө шектүү катары эки адам кармалып, Кылмыш-жаза кодексинин 94-беренесинин негизинде убактылуу камакка алынды",- деди Мукамбетова.

Ал эми жыйында маркумдун жакыны Олег Северин "кимдир бирөөлөргө эжемдин батири керек болуп, аны өлтүрүүгө атайын буйрук берилген" деп эсептээрин айтты.

Автор: Жамалидин Парманкулов