Баткенде жүздөгөн литр өсүмдүк майы жана башка азык-түлүк күйүп кетти

Баткен облусунун Кадамжай районунун Миң-Чынар айылында 3 бөлмөлүү үй күйдү. Анын кесепетинен үй ээси чоң чыгымга учурады дешет Өзгөчө кырдаалдар министрлигинен.

Белгилүү болгондой, 25-июнда З.К. аттуу жаранга таандык 3 бөлмөлүү үйдө (времянка) өрт чыгып, өрттүн аянты 96 чарчы метрге чейин жеткен.

Өрттү өчүрүүгө 1 бөлүм тартылып, саат 15:39да өрт чектөөгө алынып, 16:00дө толугу менен өчүрүлгөн.

"Тилекке каршы, үйдүн 1 бөлмөсү жана кире бериши, үй ээсинин документтери менен кошо 2 даана килем, эшик жана 4 даана терезе, 80 даана шифер, 600 литр өсүмдүк майы, 200 килограмм кумшекер жана 35 миң сомдук кара чай өрттөнгөн.

Өрттүн чыгуу себеби такталууда. Бактыга жараша, жабыр тарткандар жок", - дешет мекемеден.