Бишкекте саунада бирге эс алып жаткан учурда айыпкерди качырып жиберген күзөтчүлөр камакта калтырылышты

Бишкекте саунада бирге эс алып жаткан учурда айыпкерди качырып жиберген күзөтчүлөр камакта калтырылышты. Бул тууралуу Жогорку Сотун басма сөз кызматы жарыялады.

Буга чейин каракчылык фактысы менен айыпталган 27 жаштагы Азатбек Алымкулов 26-февраль күнү сот залынан алып чыгып кеткен күзөтчүлөрдүн колунан качып кеткени тууралуу маалымат тараган. Иликтөө иштеринин алкагында ал күнү саат 14:30 чамасында 31 жаштагы күзөтчү Б.А. өз кызыкчылыгын көздөп, кызмат абалын кыянаттык менен пайдаланып, Алымкуловду БМВ Х 5 үлгүсүндөгү унаа менен алып кеткени маалым болгон. Ошол эле күнү Б.А. эмгек өргүүсүндөгү М.А. аттуу кызматкер менен биргеликте айыпталуучунун үйүнө барышып, ал жерден келинчеги, кызы менен көрүшкөн соң эс алуучу жайга жол тартышкан. Кийин эс алуу учурунда Алымкулов качып кеткен.

Айыпкерди коштоп чыккан күзөтчүлөргө карата “кызмат абалын кыянаттык менен пайдалануу” беренеси менен кылмыш иши козголуп, алар камакка алынышкан. Чүй облустук соту бул ишти карап, күзөтчүлөрдү камакта калтыруу чечимин кабыл алды.

Автор: Алина Токтакунова