Сузакта мергенчи кар көчкүнүн астында калып каза болду

Сузакта мергенчи кар көчкүнүн астында калып каза болду. Бул тууралуу Өзгөчө кырдаалдар министрлигинин басма сөз кызматы билдирди.

Маалыматка ылайык, кырсык жаңы курулуп жаткан Бишкек-Ош альтернативдик жолундагы тоннелге жакын жердеги Көк-Зоо жайлоосунда болгон.

"27-октябрда саат 15:30-16:00 чамасында Сагын Тапаев аттуу жаран мергенчилик кылып жүрүп кар көчкүнүн астында калган. Окуя болгон жер Жалал-Абад шаарынан болжол менен 95-96 чакырым алыстыкта. Каза болгон жарандын шериктеринин айтымында, көчкүнүн узундугу 70-80 метр, туурасы 30-40 метр, бийиктиги 3-4 метрди түзөт. Алар кар көчкүдөн качып кутулууга үлгүрүшкөн", - дейт басма сөз кызматынын адиси Абдишарип Бекилов.

Кырсыкка күбө болгондор Сагын Тапаевди табууга аракет кылышканы менен, жыйынтык чыккан эмес. Саат 20:25 чамасында Таш-Көмүр куткаруучулар тобунун №2-издөө жана куткаруу бөлүмү кырсык болгон жерге бет алганы белгилүү болду.

Автор: Үмүт Абдраимова
Фото: Интернеттен алынды