Ден соолугунан мүмкүнчүлүгү чектелген эки адамды баккан эне кээде 20 сом таппай убара тартат

16-январда Курулуш башкармалыгынын дачаларына кулаган учактан кийин жергиликтүү тургундардын көпчүлүгүнүн жашоосу мурдагыдай болбой калды. Ден соолугунан мүмкүнчүлүгү чектелген жолдошу менен уулун жалгыз баккан Гүлсада Иманкулова да алардын катарына кирет. Төшөктө жаткан уулу ал кырсыктан чочуп, түнкүсүн тынч жата албай калган.

"Биз буга чейин Токтогул районунун Толук айылында жашачубуз. Баламдын оорусуна байланыштуу 2013-жылы борбордогу ооруканага жакыныраак болуу максатында айылдагы үйүбүздү сатып, "Манас" аэропортуна жакын жердеги Курулуш башкармалыгынын дачалары айылынан үй сатып алганбыз. Балам 2001-жылдан бери эхинококктордон жабыркап келет. Ушул күнгө чейин 5 жолу операция жасаттык. Буга чейин операциядан кийин өзү басып кетчү. Бул жолу уулум баспай калды. Аны жетелеп сыртка алып чыгабыз", - дейт Иманкулова.

3 жыл бою оору менен күрөшкөн Билимжан уулу Шержан 18 жашта. Ал 2016-жылдын сентябрь айынан бери төшөктө жатат. Апасынын айтымында, уулу эмнеден улам ооруп калганы белгисиз, ден соолугу жакшы болуп туруп, ооруга кабылгандан бери алсырап төшөктө жатууга аргасыз болгон.

Гүлсада Иманкулованын үй-бүлөсүндө 5 адам жашайт. Учурда бул үйдө иштеп, каражат тапкан киши жок. Балдарынын бири минтип төшөктө жатса, бири студент, бири мектепте окуйт. Күн сайын 10 сомдон 20 сом жол кире коротуп мектепке барат. Кээде мектепке барганга акча табылбай кошуналардан сураганга аргасыз болушат.

"Буга чейин ашканада иштечүмүн. Балам ооруп төшөккө жатып калгандан бери иштебей калдым. Ар бир операция үчүн 50 миң сом каражат жумшап келгенбиз. Кийинки дарылануусуна каражат таппай жатабыз. Ал тургай азык-түлүк сатып ала албай кыйналып калдык. Студент балам өзү иштеп, окуусуна акча таап берип жатат. Артканын бизге алып келет. Жолдошум аскерден башынан жаракат алып келген. Ага да бир топ каражат жумшалат", - деп кошумчалады Иманкулова.

Шержанды сыртка чыгарарда эки адам жетелеп алып чыгат. Анын атайын майыптарга ылайыкталган арабасы да жок. Апасы тааныштарынан сураштырып, майыптар арабасын убактылуу сурап келген. "Жергиликтүү социалдык коргоо кызматкерлери бул үйдө ден соолугунан мүмкүнчүлүгү чектелген эки адам жашарын билбейт. Биздин үйгө социалдык коргоо кызматкерлери келген эмес. Эгерде алардын мүмкүнчүлүгү болсо же колунда бар кишилерден жардам сурайт элем", - дейт Шержандын апасы.

Бул арада үй-бүлөнүн кожоюну Билимжан Сарпашов менен маектештик.

"Мен оорулуу болуп жумушка жарабай калдым. 2-топтогу майыптыгым үчүн мамлекеттен 3 жарым миң сом пенсия алам. Бул каражат дары сатып алганга эле жумшалат. Жашообуз кыйын болуп кетти. Өзүм 6 ай сайын дарыланып турам. Учактын кулашы да бизге катуу терс таасирин тийгизди. Түн ичинде учактын үнүнөн чочуп ойгонуп жатабыз", - дейт Сарпашов.

Сарпашовдордун үй-бүлөсү мектепте окуган баласына жумшалуучу төлөмдөрдөн бошотууну суранат. Анткени мектептин төлөмдөрүн төлөмөк тургай, жол киреге 20 сом таппай убара тартып, айрым учурларда тамак-ашсыз калышат.