Интернетке "Бекназаров менен Ташиевдин сүйлөшүүсү" делген аудио тарады. Аты аталгандар аудионун монтаж экенин айтышууда

Кечээ, 13-август күнү интернетке Азимбек Бекназаров менен Камчыбек Ташиевдин үнүнө окшош адамдардын Өмүрбек Текебаевдин сотундагы көрсөтмөлөр тууралуу чай үстүндө сүйлөшүүсү жазылган аудио тараган.

"Ата Журт" партиясынын маалымат катчысы Нургазы Анаркуловдун SUPER.KG порталына айтканына караганда, аудио катардагы чагым жана толук монтаждалган.

"Бул катардагы чагым, толук монтаждалган. Текебаевге карата соттун өкүмү чыгар алдында атайылап элди ынандырыш, коомдук пикир жаратуу үчүн жасалган. Буга чейин деле саясатчылардын сүйлөшүүсүн жашыруун жазып алышып, аларды камашпады беле. Экөө эми жөн эле сүйлөшүп отурушу мүмкүн да. Алар айтпаган сөздөрдү чаптап коюшуптур. Азыр эми техниканын жетишкен заманы да", - деди Анаркулов.

Интернетке тараган аудионун монтаждалганын Азимбек Бекназаров да айтып, сотто берген көрсөтмөлөрү тууралуу сыртка чыкканда сүйлөшпөй турганын жана сотко кайра барса деле мурдагы маалыматтарын эле айтарын билдирди.

Ал эми бүгүн, 14-августта сотто Өмүрбек Текебаев "Азимбек Бекназаров менен Камчыбек Ташиевдин сүйлөшүүсү" делген аудио жазуу монтаж болушу мүмкүн экенин айткан.

Аудио качан жана кайсы жерде жазылганы белгисиз. Төмөндө сүйлөшүүнүн стенограммасы:

- Камчыбек Ташиев: Бүгүн вынужден, баягы соттон чыксам, "Сентябрь" тартып алды, ошого интервью берип койдум. Башка эч жерден интервью бербечү элем.

- Азимбек Бекназаров: Акеңи көрдүң да? Байкуш, кейпи саал кетип калыптыр. Дүйшөн ага караганда түзүгүрөөк отурду. Бирок сөөгүн агарткыча калпты айттым. "Кудай, өзүң кечир" деп, ар калпты айткан сайын "Кудай, өзүң кечир" деп урдум да.

- К.Т.: Акам, жалган күбөдөн өтүү бул чоң күнөө да.

- А.Б.: Бирок "Кудай, өзүң кечир" деп аттым да, жалганды урдум. Ушундай калпты айттым, эч нерсеге тиешеси жок. Мен кылгам анын баарын, өзүм баш болуп, "Мегакомду" мен эметкем. Вообще аралаштырган эмесмин, мына прокурорлор отурат. Мен куратор болгом, бардыгын мен чечкем. Мунун вообще тиешеси жок.

- К.Т.: Бечараны расса колдопсуз да.

- А.Б.: Ошентип анан Өмке акаңды ыраса окшоштуруп факты менен...

- К.Т.: Өзү да ыраазы болду да тиякта отуруп. Эми сиз аны түрмөдөн чыгарганга, решёткадан чыгарганга аракет кылып атасыз да. Ушул жеринен сизди Кудайым колдойт.

- А.Б.: Бирок улам Кудайдан "кечир" деп, "калп айтып атам, кечирип кой, кечирип кой" деп, ичимен "Кудай, өзүң кечир, Кудай, өзүң кечир" деп.

- К.Т.: Мага кат жазып жибериптир. "Камчы үка, 22синде, билесиң да, менин туулган күнүм болгон. Сенин эсиңдеби?" дейт, "келип мени куттуктап, бир вино берген элең 23дө" деп. Эсимде жок, ай, вино бергенимди, куттуктаганымды, мен никогда аны куттуктаган эмесмин туулган күнү мененчи. Эсимде жок да, аа, значит болуптур да дедим дагын... О бирок эсимде жок, ака, менин вино алып келгеним. Эме деп жазып жибериптир. Билесиңби эмне деп жазыптыр? "8-10" деп коюптур скобкага. "8-10 литрлик вино көтөрүп келгенсиң" деп. Мен "8-10 билесиз го могундай бочка болот" дедим. "Минтип көтөрүп кириптирминби?" дедим. Никогда, никому көтөрүп кирген эмесмин, тем более Ак үйгө, жетинчи этажга.