Кыргыз өлкөсүнөн чыккан спортчу Валентина Шевченко UFC уюмунда салмак категориясын өзгөртүү чечимин көздөп жатат

Кыргыз өлкөсүнөн чыккан спортчу Валентина Шевченко эрежесиз уруштун эң беделдүү мелдеши - UFC уюмунун чемпиондук куру үчүн беттеште Аманда Нуньестен жеңилүү ызасын тарткан соң бөлөк салмак категорияга өтүү чечимин чыгарды. Бул тууралуу Валентина Шевченко чет өлкөлүк маалымат каражаттарга билдирген.

Анын айтымында ал атаандаштары менен бирдей абалда болуш үчүн төмөнкү салмак категориясына өтүүнү карап жатат. "Учурда мен 125 фунтка (57 килограмм) чейинки салмак категорияга өтүү чечимин көздөп жатам жана менин кийинки беттешим ушул салмакта өтөт болушу керек деп ойлойм. 57 килограмм менин чыныгы салмак категориям, төмөнкү категорияда мен бардык күч жана ыкмаларымды толугу менен колдоно аларыма ишенем, анткени менин атаандаштарым мени менен бир өлчөмдө болушат", - деген мушкер. Эскерте кетсек, Шевченко буга чейин 61 килограммдык салмак категориясында беттешке чыгып келген.

Мындан тышкары Валентина Шевченко Нуньес менен реванштык беттеш тууралуу ойлору күчүндө экенин айтты. "Албетте, менин Аманда менен күрөшүүнү токтотуу жөнүндө оюмда жок. Кийинки жолкусунда мен ага ушундай жол менен утушуна мүмкүнчүлүк бербейм. Сөзсүз мен реваншты жеңишим керек. Бирок азыр эмес, жакынкы убакыттарда андай болбойт", - деп кошумчалады Шевченко.

Автор: Нурсултан Нурболот уулу
Фото: Интернеттен алынган