32 жаштагы Баатырдын бир көзүнөн, мурдунан айрылышына 6 жашында жыгылганы себеп болгон

Жалал-Абад облусуна караштуу Аксы районунун Кара-Төбө айылынын 32 жаштагы тургуну Баатыр Баназаровдун абалы күндөн күнгө оорлошуп жатат. Учурда анын бир көзү жок, мурду да толук эмес экендигин апасы Саткын Баназарова SUPER.KG порталына бүгүн, 12-январда айтып берди.

Ал белгилегендей, Баатыр анын эң кичүү уулу. Ден соолугу чың төрөлгөн.

"6 жашында бети менен жыгылган эле, жаш балдар жыгыла берет деп маани берген эмеспиз. Бирок кийин бети карайып, ооруй баштаганда ооруканага алып барсак ириңдеп кетиптир дешти. Бетин тешип тазалашкан. Бирок ириң муну менен эле токтоп калган жок, улам-улам бетин тазалатканы алып барып жүрдүк. Кийин ириң сөөгүнө жетип кетиптир деп Караван шаарында дарыгерлер мурдунун четин алып салышкан, астыңкы эрини да ошентип кесилди. Көзү да алынды. Азыр тамак жей албайт, тиштери да түшүп калган. Суюк тамактарды оозун таңып эптеп ичет. Дарылап, таңган сайын анын териси четинен кертилип жатканын байкап жатам. Бизди биз тааныбаган эле жигит жолкиребизди төлөп Жалал-Абаддан Бишкекке алдырды, учурда анын үйүндө турабыз. Дарыгерлер дүйшөмбү күнү ооруканага жаткырабыз деп жатышат, бирок бизде анын жараатын тазалап, таңганга да каражат жок. Баламдын жүзүн сактап калууга элден жардам сурап кайрылып жатам", - дейт Баназарова.

Саткын Баназарованын өмүрлүк жолдошунун көзү өтүп кеткен. Баатырдан тышкары 4 баласы бар, алар 17 жылдан бери анын оорусуна каралашып келгени менен, дарылатууга каражаттары жетишсиз.

Ал эми аларды Жалал-Абаддан чакыртып, жардам берип жаткан Нурсултан Батыралиев өзү студент. Бишкектеги Б.Бейшеналиева атындагы маданият жана искусство университетинде окуйт.

"Мен тааныштарым аркылуу Баатыр Баназаровдун абалы тууралуу уктум, атам ооруканада иштегендиктен аларды шаарга алып келүүнү туура көрдүм. Өзүм 2-курстун студентимин, жатаканада жашайм. Бирок Таш-Дөбө айылында үйүбүз бар, эже менен баласын ошол үйгө жайгаштырып койгом. Дарыканага жаткырып, дарылатуу үчүн аракеттерди көрүп жатабыз", - деди Нурсултан Батыралиев.

Жардамдашууну каалагандар үчүн Саткын Баназарованын байланыш номери 0773679822.